Vi ynskjer å styrke den kommunale kreftomsorga, og med økonomisk støtte frå Kreftforeningen er det oppretta stillingar som kreftkoordinatorar i fleire kommunar i Sogn og Fjordane. Stadig fleire kommunar opprettar slike stillingar, og ein kan finne oppdatert oversikt på kreftkoordinatorar i alle fylker på Kreftforeningen si nettside: https://kreftforeningen.no/rad-og-rettigheter/praktisk-hjelp/kreftkoordinator-i-kommunen/inne

Kva kan kreftkoordinator bidra med?

Kreftkoordinator er ein fagperson som:

• har tid til å lytte, og kartlegge behov for tilbod og tenester
• kan vere eit bindeledd mellom fastlege, spesialisthelsetenesta og kommunen, samt formidle kontakt med dei ulike tenestene
• kan svare på faglege spørsmål og gje rettleiing
• kan syte for praktisk hjelp og støtte
• kan bidra med å legge kvardagen til rette for kreftsjuke og pårørande på best mogeleg måte
• har oversikt og informerer om ulike tenester og tilbod innan kreftomsorg
• er ein støttespelar for barn og unge som er ramma av kreft, eller der barn er pårørande

Korleis ta kontakt

Tilbodet med kreftkoordinator skal vere eit lågterskeltilbod, der pasientar, pårørande, helsepersonell eller andre kan ta direkte kontakt.

Kreftkoordinator kan kontaktast i alle fasar av sjukdommen, og samarbeider tett med ressurssjukpleiarar i kreftomsorg, fastlege, NAV, skular, barnehagar, helsestasjon, heimeteneste, sjukeheim, spesialisthelsetenesta, lokale pasientforeiningar og Kreftforeningen.