Utviklingsplan for Helse Førde - innsatsområde

03. Oppgåvedeling og samhandling

Helse Førde har mange behandlingsstadar, som til saman skal gje eit samla, likeverdig og koordinert tilbod til pasientane. Det er etablert arbeidsdeling mellom sentralsjukehuset i Førde og lokalsjukehusa.

En statue av en hjort foran en bygning med et fjell i bakgrunnen — Lærdal sjukehus

Føretaket har ansvar for eit stort areal, og det er mykje transport og pasientflyt mellom lokasjonane her, og mot Helse Bergen, som er vårt universitets-/traumesjukehus.

Det kan vere ei utfordring å sikre rett balanse mellom nære tenester og ein desentralisert struktur, og å sikre robuste fagmiljø med 24/7 tenester. Det vert kontinuerleg arbeidd med å desentralisere det vi kan, samstundes er det nokre tenester som må sentraliserast.

Helsefellesskap for å utvikle helsetenestene saman

Etablering av helsefellesskap mellom kommunane, helseføretaket, fastlegane og brukarane er eitt av dei nasjonale grepa for å sikre samanhengande helse- og omsorgstenester. Behovet for samordning er definert som spesielt viktig for dei fire prioriterte pasientgruppene: Skrøpelige eldre, barn og unge, personar med fleire kroniske lidingar og personar med alvorlege psykiske lidingar og rusproblem. Helse Førde og kommunane i Sogn og Fjordane har hatt eit godt samarbeid over mange år, som no vert vidareført i helsefellesskapet.

Mål

Bidra i samarbeidet med kommunane om å utvikle ei meir einskapleg helseteneste som koordinerer behandlinga og tilbyr tenestene på beste effektive omsorgsnivå.
Legge til rette for deltaking i helsefellesskapet frå fastlegar og brukarrepresentantar.
Gjere vårt for å skape kultur for felles planlegging og kompetansestyrking mellom sjukehusa og primærhelsetenesta.

Tiltak for å nå måla

Bidra i arbeidet med å etablere og utvikle helsefellesskap mellom Helse Førde og kommunane.
Samarbeide med kommunane om å etablere fagnettverk for dei fire prioriterte pasientgruppene: Skrøpelige eldre, barn og unge, personar med fleire kroniske lidingar og personar med alvorlege psykiske lidingar og rusproblem.
Samarbeide om revisjon av avtalane mellom Helse Førde og kommunane, og gjere dei meir kjent og forankra i eigen organisasjon.
Samarbeide om tiltak innan rekruttering og kompetanseutvikling.
Jobbe for at vi i større grad nyttar samhandlingsavvik som grunnlag for læring og justering i fellesskap. Ta i bruk felles digitalt system for avviksmelding, melde.no når dette er klart.
Gjennomføre attståande tiltak i prehospital plan, og formalisere samarbeidet i akuttmedisinsk samhandlingsforum for å vidareutvikle samhandlinga om akuttmedisinske tenester.
Samarbeide med kommunane om å gjere tydelege tiltak innan førebygging og folkehelse, mellom anna ved betre informasjon om eksisterande tiltak til pårørande og brukarar.
Vidareutvikle intern organisering som bidrar til god koordinering på tvers, og støttar opp om samarbeidet med primærhelsetenesta.
Vidareutvikle og styrke føretaket som "sjukehus i team" for god koordinering mellom lokal-, sentral- og regionssjukehusa.
Vidareutvikle lokalsjukehusfunksjonane og invitere kommunane med.
Bidra i samarbeidet mellom Helse Førde, kommunane, utdannings- og forskingsmiljøet og næringslivet om forsking- og innovasjonsprosjekt i helsesektoren.

Slik skal vi måle at vi er på rett veg

Helsefellesskap er formelt etablert mellom Helse Førde og kommunane i opptaksområdet og avtaleverket er revidert.
Samarbeidet om å lære av samhandlingsavvik er styrka.
Inn- og utskrivingsrutinar er gjennomgått og vidareutvikla.
Etablert felles innsats for dei fire prioriterte pasientgruppene, mellom anna gjennom kompetansebygging.
Samhandlingsforum for akuttmedisinske tenester fungerer som forum for å diskutere og vidareutvikle dette området.
Sjukehus i nettverk; det er god kapasitetsutnytting ved alle lokasjonane.
Pasientforløpa mellom Helse Førde og Helse Bergen/HUS som regionssjukehus er godt koordinerte, til dømes innan krava til pakkeforløp kreft.
Etablert samarbeid om kompetanseutvikling og forsking/innovasjon, mellom anna gjennom campusutvikling.