Pasientreiser
Har du vore til behandling, kan du søke om å få stønad til reisa. Treng du tilrettelagd transport for å komme til behandling, kan du ha rett til å få ei rekvirert reise.
Som hovudregel får du pengestøtte til pasientreisa di med eit fast beløp per kilometer (standardsats), uansett kva transportmiddel du bruker. Du må betale eigendel for reisa, om du ikkje har frikort.
For å få reisegodtgjersle, må avstanden til behandlingsstaden vere lengre enn ti kilometer kvar veg. Hovudregelen er at reisa også må gå over meir enn éi takstsone.
Du kan søke om pengar etter at reisa er gjennomført.
Søknaden må sendast inn seinast seks månader etter behandlingsdatoen.
Søk om å få stønad til reiseutgifter
Ved å logge deg inn på Helsenoreg, kan du søke digitalt om å få støtte til pasientreiser til og frå offentleg godkjent behandling.
Om du ikkje vil bruke den digitale tenesta, kan du søke om å få støtte til reiseutgifter ved å sende inn reiserekningsskjema på papir til Pasientreiser HF. Søknadsskjema på papir finn du hos behandlaren din eller på Helsenoreg.
Om Pasientreiser på helsenorge.no
Behov for tilrettelagd transport?
Om du av helsemessige eller trafikale årsaker ikkje kan reise med offentleg transport, køyre sjølv eller bli køyrd, kan du ha rett på ei rekvirert reise. Det betyr at det lokale pasientreisekontoret ditt organiserer reisa for deg, og vel det transportmiddelet som er mest formålstenleg. Om du ikkje har fritaksgrunn, eller frikort, betaler du berre eigendel for reisa. Det er behandlaren din som avgjer om du har behov for organisert reise av helsemessige årsaker.
Rekvirert pasientreise for tilrettelagd transport
Ved å logge deg inn på helsenorg.no, finn du oversikt over, og informasjon om, framtidige rekvirerte pasientreiser. Du kan også endre, avbestille og bekrefte rekvirerte reiser. Etter kvart vil det også bli mogleg å bestille rekvirerte reiser.
Nyheit 2024/2025: Bestill reisa di sjølv
I 2024/2025 testar Pasientreiser ut ei ny løysing som gjer det mogleg for pasientar sjølv å bestille ei rekvirert reise.
Det er behandlaren din eller Pasientreiser som lagar ein reiseattest for deg, om du har behov for tilrettelagd transport til eller frå behandling for ein periode. Med ein reiseattest for tilrettelagd transport kan du sjølv bestille ei rekvirert reise. Du vel sjølv tidspunktet du ønsker å vere framme ved behandlingsstaden, men Pasientreiser ordnar reisa for deg og vel transportmiddel. Du kan også få ein reiseattest for bruk av bil i ein periode.
Bestill reisa di sjølv – informasjon på helsenorge.no
Kontakt Pasientreiser
Har du spørsmål, treng du hjelp til utfylling av søknad eller bestilling av reise? Ring Pasientreiser på 05515.
Om pasientreiser på helsenorge.no
Helsepersonell og andre fagpersonar finn meir informasjon om pasientreiser på pasientreiser.no