Livabygget

Det har i arbeidet med kunsten blitt prioritert å få ein god samanheng i bygget gjennom å underbygge namnet "Liva".

I val av kunstnarar har det vore viktig å få ein god samansetning av kunstnarar med tanke på alder, kjønn og geografisk tilknyting.

Det har vore eit mål at kunsten skal bidra til å skape samanheng mellom Livabygget og det eksisterande Svanabygget, mellom anna ved å granske historia og arkitekturen. Det har vore særleg viktig å vidareføre fargepaletten frå Svanabygget.

Kunstverk av Simone Hooymans

Foto og videokunstverk — «As Far as You Can See» Dei tre bilda er tekne på ulike tidspunkt i videoen og gir eit forsiktig inntrykk av korleis Hooymans formidlar historia si.

I inngang til, og i nisjane i korridorane i femte etasje i Livabygget har Simone Hooymans skapt eit verk som består av video med lyd til fleire skjermar, og folieringing (tapet) av omkringliggande fendringsplater frå golv til tak.

utsnitt av videokunst — Eit utsnitt: Videoane kan skildrast som eksperimentelle animasjonar basert på handteikning av motiv henta frå naturen.

Verket gir pasientar i alle aldrar ein augneblink av ro og glede. I løpet av fem minuttar vil plantar vekse, insekt og fuglar bevege i landskapet, regnet falle og morgontåka avsløre ei anna verd bakom.

Samtidig oppslukande og likevel unnvikande, kan Hooymans sine landskap ofte opplevast som meditative, symbolske og leikne. Videoverket i Livabygget endrar seg òg frå dag til natt. Hennar karakteristiske bruk av atmosfæriske perspektiv trekkjer sjåaren inn i verket, mot detaljar der gjenkjennelege og fabulerande element skapar ei historieforteljing i fleire lag.

Kunstverk av Javier Barrios

Circuit (2024) - Fire gjennomlyste maleri på plexiglas.
Foto: Javier Barrios

Til resepsjonsområdet i 4., 6., 7. og 8. etasje i Livabygget har Javier Barrios laga fire vegghengte verk i serien Circuit. Verka er laga som abstrakte maleri på plexiglas og er gjennomlyst av LED-lys. Måten Barrios nyttar lys og kombinerer fargar gjer at verka framstår glødande og som fulle av energi. Sirkelforma, som er eit gjennomgåande element i kunstnarskapen, leier tankane mot soler og planetar, og gir Circuit eit kosmisk uttrykk.

Kunstnaren ved verket sitt — Javier Barrios monterte sjølv verka sine i Livabygget.

Gjennom penselstrøka og dei organiske formene oppnår Barrios ein dynamisk verknad og tekstur, og slik skapar han ein slags eksperimentell topografi. På avstand er særleg fargen og lyset iaugefallande, mens dei som ser nå nært hald vil oppleve nye former og detaljer. Dei fire verka til Livabygget får kvar sin farge – oransje, gul, grøn og blå – som også speglar med fargepaletten i dei ulike etasjane.

Kunstverk av Harald Fenn

Vindauge med glaskunst — *Hagen:* (2024) Kunstverk i folie på vindauge.

Til glaskorridoren som bind saman det nye og gamle sjukehusbygget på Førde sentralsjukehus har Harald Fenn skapt eit kunstprosjekt som strekkjer seg over fem etasjar, frå fjerde til åttande. Verket består av farga, transparente foliar som er montert på vindauga i korridoren mellom Svanabygget og Livabygget.

Kunstnaren under montering av kunsten — Harald Fenn var tilstade i Livabygget då kunstverka vart monterte i glaskorridorane.

Fenn har gitt kvar etasje sin eigen farge, og late seg inspirere av strået, kvisten, greina og rota – alle element som i sin enkelheit òg representerer det enklaste verkemiddelet vi har i kunsten, nemleg streken. På sørsida der bygget har mest vindauge og utsikt, skapar eit mønster av abstrakte linjer ein optisk og romleg verknad, der òg strekane sin dynamiske komposisjon kan assosiere til liv, nysgjerrigheit, forandring og draumar. På nordsida der glasfasaden er smalare, vert etasjane bundne saman vertikalt ved éi enkelt linje som i sin enkle form kan minne om ei spire, ein livsnerve eller eit håp.