God start Nordfjord sjukehus
Etterkontroll hos jordmor
Etter fødsel er det anbefalt at du gjennomføre ein etterkontroll hos lege eller jordmor. Kontrollen er gratis, og blir vanlegvis utført mellom 6-10 veker etter fødsel.
Du kan avtale timen for etterkontroll med jordmor på God Start før du reiser heim frå barsel, eller du kan ringe til God Start og be om å få ein time. Du treng ikkje tilvising.
Så godt det let seg gjere, prøver vi å få det slik at jordmora som fulgte deg opp i svangerskapet gjennomfører etterkontrollen din.
Kva blir undersøkt på ein etterkontroll?
Kroppen din har gått gjennom store forandringar i svangerskapet, under fødsel og i barseltida. Dette kan kjennes overveldande for mange kvinner og par. Barnet har vore mykje i fokus. På etterkontrollen ønsker jordmora å sjekke at du har det bra både mentalt og fysisk. Ho har difor mest fokus på deg som har født, men har sjølvsagt også litt fokus på barnet ved behov.
Tema som blir tatt opp på etterkontrollen kan tilpassast etter behov, men dei vanlegaste tema er likevel:
- Å snakke om fødselsopplevinga di, dersom du har behov for det
- Kontroll av eventuelle sting og sårtilheling etter rifter i underlivet eller keisersnitt
- Trening og knipeøvingar
- Søvn
- Amming
- Seksualitet
- Informasjon om prevensjon og seksualliv
- Kvardagen med eit nyfødt barn
- Blodtrykksmåling og blodprosent
- Sjekke at livmora har trukket seg godt saman, og om vaginalblødning har stoppa
- Psykisk helse i mammarolla
- Ellers gi deg råd og rettleiing etter behov
Dersom det er behov for det, tilviser vi deg vidare til andre instansar for oppfølging. Det kan for eksempel vere psykisk helseteam eller gynekologisk poliklinikk.
Velkomen til etterkontroll! Du kan kontakte oss på 57 86 42 00.