Det nye sjukehusbygget, Livabygget, skal koplast til Svanabygget, og det er dette som er bakgrunn for ombyggingane som no har starta. Tenester og funksjonar som ligg i dette området, blir flytta både mellombels og permanent. 

Ombyggingsarbeidet har starta i første etasje i Svanabygget. Lokala til fysikalsk medisinsk poliklinikk og fysioterapi/ergoterapi er avstengde for ombygging, og tenestene er flytta til Angabygget. Også arealet til innskriving og pasientreiser skal byggast om, og apoteket skal få ny plassering. 

I dei komande åra forventar vi at pasientar, pårørande og brukarar vil oppleve vanskar med å finne fram til tenester som har flytta på seg. Det er ingen kvikk fiks på dette. Det tryggaste er å ha nokre minutt ekstra slik at du kan få hjelp til å finne fram.

Det er og blir støy frå ombyggingsarbeidet, spesielt frå arbeid i betong. Kjerneboring, betongsaging og meisling gjennom vegar og golv lagar støy. Støyen forplantar seg både opp og ned i høgblokka. Sit du i kantina i andre etasje, høyrer du godt når det er boring i betong i etasjen under. Det mest støyande arbeidet blir lagt til rett etter normalarbeidstid og fram til klokka 19.00 på kvelden.

Hovudregelen er at ombyggingsareala blir avstengde fysisk. Det blir sett opp skiljeveggar mellom sjukehuset si drift og byggeplassen. Utvendig blir byggeområdet avskilt og sikra med byggegjerde som vernar publikum mot ulemper ved transport av byggematerial, utstyr m.m. 

Heile byggeprosjektet skal halde fram til 2028, så ulemper frå byggearbeid må vi gjere oss fortrulege med. I den andre enden står eit modernisert sjukehus klart, med alle dei fordelane dette har for pasientar, brukarar og tilsette. Hald ut!